fish study

Datu gali sa El Nido mi 888 species y isda. D’ya ang resulta y ang research nga ing buat ni Dr. Gerald R. Allen, isarang Fish Scientist nga kilala sa bilog nga kalibutan, asta ni Dr. Mark V. Erdmann, isarang Coral Reef Ecologist. Ag eseb sanda sa mga dive sites agalin Bacuit Bay tegka isla y ang Imorigue sa Dewil. Ing buat ang research umpisa June 2007 tegka June 2009.

Pinakamarakeng species ang akita sa Cagbantang Cove sa Matinloc Island nga mi 211 species; agdasun ang Pangulasian Island nga mi 208; pangatlo ang Tres Marias Marine Sanctuary nga mi 197. Midyan dang adiskubre nga 11 bagong species y ang isda sanda Dr. Allen.

Sa pagkadiskubre nga dia, ang El Nido ron ang pangarwa sa pinaka-manggaden sa kalibutan pag-abot sa species y ang isda. Nauna ang Maumere Bay sa Flores Island, Indonesia nga mi 1,111 species. Agadason kanaten ig sa pangatlo ang Togean asta Banggai Islands, sa Indonesia ra, nga mi 819 species. Pang-apat den lamang ang Komodo Island nga mi 722.

Animan dadi pursigido ang munisipyo asta ang El Nido Foundation sa pag-betang y ang mga marine sanctuary sa mga barangay agud ma-protektan ang ateng mga isda. Sigue ra sa pandakep y ang mga manig-bungbung ig manig-sodium ang mga tauhan y ang Municipal Environmental Desk Office [MEDO].  Basi pang magtabang kamo ra agud midyan kita pang makawil sa madasun nga mga dagun [Arvin L. Acosta, LGU].